NURIDDIN MUHAMMAD JAHONGIRSHOH VA MALIKA NURJAHONBEGIMLARNING ADABIY KECHALARI TARIXI

Boburiy Jahongirshoh nomi bilan mashhur bo‘lgan Shoh Salim ham tariqat namoyandasi - shayx, ham shoir, ham mutafakkir bo‘lgan. Ma’lumotlarga ko‘ra, “yoshi yigirma yettiga to‘lganda o‘sha davrning mashhur avliyo va shayxlarining Allohga qilgan iltijo va duolaridan so‘nggina 1569 yilda Akbarshoh o‘g‘il farzand ko‘rdi. Unga Allohdan o‘g‘il farzand tilab bergan ajmerlik shayx Salim Cheshtiydan minnatdorlik belgisi sifatida tilab olingan shahzodaga Muhammad Salim deb ism qo‘ydilar. Podshoh otasi uni ba’zan erkalatib, “Shayx Bobo” deb ham atardi”.[1] Mutribiy “Tazkirat ush-shuaro”da Jaloliddin Muhammad Akbarshohning farzandi “ulug‘ nomli shahriyor Shayxu podshoh” haqida shunday yozgan: “Nihoyatda oliyhimmat podshoh bo‘lib, fazl ahliga juda yaxshi rioyat va tarbiyatlar ko‘rguzardi. Jannat oyin-qoidali majlisi doimo olim va solih odamlarga to‘la bo‘lardi.