BOBURIY PODSHOH SHOHJAHON VA UNING IJODKOR AVLODI TARIXI

Abul Muzaffar Shahobiddin Xurram (Shohjahon) adabiyotsevar boburiy hukmdorlardan bo‘lgan. Doktor Shafiqa Yorqin Shoh Jahon va uning zavjasi Mumtoz Mahalbegimning ijodi tazkiralarda qayd etilganini yozgan: “Boburshohning nabiralari va ularning farzandlari ham she’riy iste’dodni Boburshohdan meros olib, she’ru adabiyot an’analarini ko‘ragoniylar oilasida davom ettirdilar. Misol uchun, Komronning qizi Gulruxbegim va o‘g‘li Abulqosim Shavkatiy, Akbar, Shoh Jahon va uning zavjalari, Avrangzebning qizi Zebunnisobegim, Bahodirshoh Zafar va boshqalarning nomi va asarlari ayrim tazkiralarda zikr etilgan. Demak, Boburshoh nafaqat buyuk bir imperiyani, eng shavkatli bir madaniy davrni o‘z farzandlariga meros qilib qoldirmadi, balki shoirlik va tarixchilik iste’dodini, ilmparvarlik va san’atga qiziqish kabi oliy xislatlarni ham qoldirib, tarixda boburiylar (ko‘ragoniylar) nomini mangulikka erishtirdi”.[1]